اسلام آباد: (رائیٹ ناؤنیوز) وفاقی وزیر منصوبہ بندی احسن اقبال نے کہا ہے کہ حکومت بانی پی ٹی آئی کی صحت پر کوئی سمجھوتہ نہیں کرے گی۔ انہوں نے وضاحت کی کہ انہیں جیل میں علاج کی تمام ضروری سہولیات فراہم کی جا رہی ہیں۔

احسن اقبال نے مزید بتایا کہ بانی پی ٹی آئی کے علاج کے لیے بہترین ڈاکٹرز دستیاب ہیں اور اس حوالے سے کسی کو تشویش نہیں ہونی چاہیے۔ ان کا کہنا تھا کہ بانی پی ٹی آئی جس سیل میں قید ہیں، وہاں علاج کی مکمل سہولت موجود ہے۔

وفاقی وزیر نے بانی پی ٹی آئی کی صحت کے معاملے میں غفلت نہ ہونے کی یقین دہانی کرائی ہے۔ ان کے مطابق بانی پی ٹی آئی سیاسی قیدی نہیں بلکہ سزایافتہ ہیں اور حکومت ان کی صحت پر پوری توجہ دے رہی ہے۔

احسن اقبال نے مزید کہا کہ ملک کو احتجاج کی بجائے معاشی استحکام کی ضرورت ہے۔ گھیراؤ جلاؤ کی سیاست ملک کے دشمنوں کو فائدہ پہنچا سکتی ہے۔ ان کے بقول، پاکستان کو اس وقت اقتصادی لانگ مارچ کی ضرورت ہے۔

یاد رہے کہ پاکستان پیپلز پارٹی حکومت کی اتحادی ہے اور اس کے ساتھ ہی رہے گی۔ وفاقی وزیر نے کہا کہ پیپلزپارٹی حکومت کے ساتھ کھڑی ہے اور کہیں نہیں جا رہی۔