ٹوکیو: (رائیٹ ناؤ نیوز) جاپان نے غیر ملکی ہنر مند کارکنوں کے لیے ٹائپ 2 مخصوص ہنر مند ورکر ویزا کے تحت قیام کی مدت میں پانچ سال کی توسیع تجویز کی ہے۔ اس مقصد کے لیے جاپان کی امیگریشن سروسز ایجنسی نے ایک مسودہ وزارتی آرڈیننس جاری کیا ہے۔

حکومت نے عوامی آرا کے بعد اس نئے طریقہ کار کا آغاز اگلے سال جنوری میں کرنے کا منصوبہ بنایا ہے۔ موجودہ قوانین کے مطابق غیر ملکی ورکرز کو چھ ماہ سے تین سال تک قیام کی اجازت ملتی ہے۔

نئے ویزا پروگرام کی تفصیلات ابھی حتمی شکل دینا باقی ہے۔ حکومت نے بتایا ہے کہ جلد ہی مکمل معلومات فراہم کی جائیں گی۔ یہ اقدام نرسنگ کیئر ورکرز کی طرز پر قیام کی مدت برابر کرنے کے لیے کیا جا رہا ہے۔

یہ تبدیلی جاپان میں طویل عرصے سے مقیم غیر ملکیوں کے لیے اہم ہے۔ پانچ سالہ ویزا سے قانونی مراحل پورا کرنا اور مستقل رہائش کی شرائط پوری کرنا آسان ہو جائے گا۔

واضح رہے کہ پہلے غیر ملکی ورکرز کو زیادہ سے زیادہ تین سال کا ویزا ملتا تھا، جس سے بار بار ویزا کی تجدید کرانی پڑتی تھی۔ نئے پانچ سالہ ویزا سے قیام مستحکم ہوگا اور مستقل رہائش کی درخواست آسان ہو جائے گی۔