اسلام آباد: (رائیٹ ناؤ نیوز) وفاقی حکومت 10 لاکھ میٹرک ٹن گندم کی درآمد پر ٹیکس چھوٹ دینے پر غور کر رہی ہے۔ وزارت قومی غذائی تحفظ نے یہ تجویز دی ہے تاکہ ملک میں گندم کی قلت کو پورا کیا جا سکے۔

ذرائع کے مطابق، اس تجویز میں صوبائی انفرا سٹرکچر ڈویلپمنٹ سیس سے بھی استثنیٰ شامل ہے۔ پاسکو کے ذخائر میں موجود 10 لاکھ ٹن گندم صوبوں کو فراہم کرنے کی پیشکش کی گئی ہے۔

پاسکو کی گندم کے بعد باقی ضروریات درآمد سے پوری کی جائیں گی۔ پاسکو کی گندم کی لاگت کا تخمینہ 141 ارب روپے جبکہ درآمد پر 34 کروڑ ڈالرز کا تخمینہ لگایا گیا ہے۔

صوبوں نے اپنے گندم کے ذخائر میں کمی کی نشاندہی کی ہے۔ ای سی سی نے نائب وزیراعظم کی سربراہی میں اسٹیئرنگ کمیٹی تشکیل دی ہے۔

واضح رہے کہ پاکستان میں گندم کی طلب بڑھنے پر حکومت نے درآمدات میں اضافہ کرنے کا فیصلہ کیا ہے۔