لاہور: (رائیٹ ناؤ نیوز) پنجاب حکومت نے گندم کی ریلیز پرائس مقرر کر دی ہے۔ پنجاب کابینہ کی منظوری کے بعد محکمہ فوڈ سیفٹی اینڈ کنزیومر پروٹیکشن نے نوٹیفکیشن جاری کر دیا ہے، جس کا اطلاق فوری طور پر ہوگا۔

نوٹیفکیشن کے مطابق پاسکو سے حاصل کردہ اور ایگریگیٹرز کے پاس موجود گندم کی قیمت 3 ہزار 800 روپے فی 40 کلوگرام مقرر کی گئی ہے۔ یہ قیمت مارکیٹ میں گندم کی دستیابی کو بہتر بنانے کے لئے مقرر کی گئی ہے۔

پنجاب فوڈ سٹفس (کنٹرول) ایکٹ 1958 کے تحت یہ نوٹیفکیشن جاری کیا گیا ہے۔ تمام کمشنرز، ڈپٹی کمشنرز اور متعلقہ اداروں کو احکامات پر عملدرآمد یقینی بنانے کی ہدایت کی گئی ہے۔

یہ اقدام پاکستان فلور ملز ایسوسی ایشن اور دیگر متعلقہ اداروں کو مطلع کرنے کے لئے کیا گیا ہے۔ اس سے مارکیٹ میں گندم کی قیمتوں میں استحکام کی امید ہے۔

یاد رہے کہ گندم کی قیمت میں اضافے کے باعث عوامی مشکلات میں اضافہ ہو رہا تھا۔ حکومت نے قیمت کو کنٹرول کرنے کے لئے یہ قدم اٹھایا ہے۔