اسلام آباد: (رائیٹ ناؤ نیوز) پاکستان پیپلز پارٹی کے چیئرمین بلاول بھٹو زرداری نے کہا ہے کہ پاکستان کی فوج ہماری ریڈ لائن ہے اور ان کی قربانیوں کا احترام قومی ذمہ داری ہے۔

بلاول بھٹو نے اپنے ویڈیو بیان میں کہا کہ کشمیر کی سرحد پر کھڑا سپاہی جان خطرے میں ڈال کر پاکستان کی حفاظت کرتا ہے۔ ان کا مزید کہنا تھا کہ ہمارے سپاہی قوم کا فخر ہیں اور کسی سیاسی بحث کا نشانہ نہیں بننے چاہئیں۔

بلاول بھٹو نے کہا کہ شہداء کی قربانیوں کو کبھی نہیں بھلایا جا سکتا، اور ان کے لواحقین کو انصاف ملنا چاہیے۔ انہوں نے اس بات پر زور دیا کہ جو اپنا آج ہمارے کل کے لیے قربان کرتے ہیں، ان کی عزت ہماری ذمہ داری ہے۔

بلاول بھٹو نے الیکشن کمیشن سے مطالبہ کیا کہ 2 اگست سے قبل دھاندلی سے متعلق تمام شکایات کی کھلی عدالت میں سماعت کرے۔ ان کا کہنا تھا کہ پولنگ اسٹیشنوں کے نتائج اور انتخابی ریکارڈ عوام کے سامنے پیش کیے جائیں۔

واضح رہے کہ بلاول بھٹو نے آزاد کشمیر کے انتخابات کے پہلے مرحلے کی شفافیت پر بھی زور دیا تھا اور کہا تھا کہ انتخابات کی ساکھ انصاف اور شفافیت سے ہی ممکن ہے۔