ملتان: (رائیٹ ناؤنیوز) وفاقی وزیر صحت مصطفیٰ کمال نے محسن نقوی کی نئے صوبے بنانے کی تجویز کی حمایت کی ہے۔ ان کا کہنا ہے کہ نئے ایڈمنسٹریٹو یونٹس بنانے سے کراچی کے مسائل حل ہو سکتے ہیں۔

مصطفیٰ کمال نے یونیورسٹی آف سائنس اینڈ ٹیکنالوجی کی افتتاحی تقریب میں کہا کہ پاکستان دنیا کے 180 ممالک سے بڑا ہے۔ ملک میں مزید ایڈمنسٹریٹو یونٹس کی ضرورت پر زور دیا ہے۔

وزیر صحت نے وضاحت کی کہ ادویات کی قیمتیں کم یا زیادہ کرنا ان کا کام نہیں ہے۔ ڈریپ نے کچھ ادویات کی قیمتوں کو ڈی ریگولیٹ کیا ہے جبکہ کابینہ میں قیمتوں پر کمیٹی بنی ہوئی ہے۔

انہوں نے افسوس کا اظہار کیا کہ دہشتگردی کے واقعات پر افسردگی ہوتی ہے مگر بچوں کی اموات پر توجہ نہیں دی جاتی۔ انہوں نے کہا کہ 4 لاکھ بچے مختلف بیماریوں سے مر جاتے ہیں۔

واضح رہے کہ پاکستان میں 1 کروڑ 10 لاکھ لوگ ہیپاٹائٹس سی کا شکار ہیں۔ شوگر اور دل کے امراض بھی بڑے مسائل ہیں۔ ویکسین کے متعلق لوگوں میں غلط فہمیاں پائی جاتی ہیں۔