سندھ کے مدارس میں 2,132 طلبہ کے ایچ آئی وی ٹیسٹ منفی آئے ہیں، جو بچوں کی صحت کے لیے مثبت علامت ہے۔
کراچی: (رائیٹ ناؤ نیوز) سندھ کے مختلف مدارس کے 2 ہزار سے زائد طلبہ کا ایچ آئی وی/ایڈز اور ہیپاٹائٹس کے لئے حال ہی میں ٹیسٹ کیا گیا، جن کے نتائج منفی آئے ہیں۔
صوبائی محکمہ صحت کے مطابق، 2,132 بچے مختلف مذہبی اداروں میں زیر تعلیم تھے جنہیں کمیونیکیبل ڈیزیز کنٹرول (سی ڈی سی)، ایچ آئی وی پروگرام کے تحت اسکریننگ کے ذریعے جانچا گیا۔
دوران تجزیہ کسی بھی بچے میں انفیکشن نہیں پایا گیا جو کہ ایک حوصلہ افزا علامت ہے۔ اس مہم کا مقصد بچوں میں ان بیماریوں کے پھیلاؤ کو روکنا تھا۔
محکمہ صحت نے تمام مدارس کے انتظامی افسران، والدین اور اساتذہ کا تعاون پر شکریہ ادا کیا ہے۔ محکمہ نے بچوں کی صحت کے تحفظ کے لئے ایسی مہمات کو جاری رکھنے کا عزم ظاہر کیا ہے۔
یاد رہے کہ سندھ میں بچوں کے درمیان ایچ آئی وی/ایڈز کے متعدد واقعات سامنے آئے تھے، جن میں کراچی کے کلسوم بائی ولیکا اسپتال میں 100 سے زائد بچوں میں یہ وائرس پایا گیا۔
