ممبئی: (رائیٹ ناؤ نیوز) بھارتی اداکار پریش راول نے سشانت سنگھ راجپوت کی موت پر میڈیا کوریج کو سخت تنقید کا نشانہ بنایا ہے۔ انہوں نے کہا کہ اس معاملے کو میڈیا نے سرکس بنا دیا تھا جس پر انہیں شدید نفرت محسوس ہوئی۔

پریش راول نے ایک پوڈکاسٹ میں گفتگو کے دوران بتایا کہ کورونا لاک ڈاؤن کے دوران وہ زیادہ تر نیوز چینلز سے دور رہے۔ ان کا کہنا تھا کہ ان کے بلڈ پریشر کی وجہ سے بھی انہوں نے نیوز دیکھنے سے گریز کیا۔

سشانت سنگھ کی موت پر میڈیا کوریج کے بارے میں اداکار نے کہا کہ انہیں اس سرکس سے نفرت تھی۔ انہوں نے واضح کیا کہ میڈیا نے اس معاملے کو غیر ضروری طور پر بڑھا چڑھا کر پیش کیا۔

اداکار نے سیاست کو چھوڑنے کی وجہ بھی بیان کی۔ انہوں نے کہا کہ 2014 کے انتخابات میں کامیابی کے باوجود سیاست میں جھوٹ بولنے کا خوف تھا، اسی لیے انہوں نے اداکاری کو ہی اپنی شناخت بنایا۔

یاد رہے کہ پریش راول نے کئی دہائیوں تک اداکاری کی ہے اور اب وہ اپنے فن پر پہلے سے زیادہ عبور حاصل کر چکے ہیں۔ انہوں نے سیاست کے بجائے اداکاری کو اپنی اصل شناخت بنانے کا فیصلہ کیا ہے۔