اسلام آباد: (رائیٹ ناؤ نیوز) لا اینڈ جسٹس کمیشن نے انٹرنیشنل کمرشل کورٹ آف پاکستان کے قیام کیلئے آئینی ترمیم کی سفارش کی ہے۔ اجلاس کی صدارت چیف جسٹس آف پاکستان نے کی، جس میں اٹارنی جنرل اور ہائی کورٹس کے چیف جسٹس صاحبان نے شرکت کی۔

اجلاس میں وفاقی وزیر قانون و انصاف نے بھی خصوصی دعوت پر شرکت کی۔ کمیشن نے وفاقی حکومت کو انٹرنیشنل کمرشل کورٹ کی سفارش بھجوادی۔ یہ عدالت بین الاقوامی تجارتی تنازعات کے فوری حل کے لیے قائم کی جائے گی۔

مجوزہ عدالت ثالثی ایوارڈز کے نفاذ کو مضبوط بنائے گی اور تجارتی قوانین میں یکسانیت کو فروغ دے گی۔ اس سے تجارتی قوانین کی پیشگوئی میں بھی مدد ملے گی۔

اس عدالت کے قیام سے سرمایہ کاروں کے اعتماد میں اضافہ ہوگا۔ یہ پاکستان کو عالمی تجارت اور سرمایہ کاری کے لیے پرکشش مقام بنائے گی۔

یاد رہے کہ انٹرنیشنل کمرشل کورٹ کا قیام پاکستان کی اقتصادی ترقی اور بین الاقوامی سطح پر تجارتی حیثیت کو مضبوط بنانے کے لئے اہم قدم ہو سکتا ہے۔