اسلام آباد: (رائیٹ ناؤ نیوز) وزیراعظم شہباز شریف نے ‘اڑان اوورسیز پاکستان سمر سکالرز پروگرام’ کے تحت انٹرن شپ کرنے والے سکالرز سے ملاقات کی۔ انہوں نے نوجوانوں کے کردار کو ملکی ترقی کے لیے اہم قرار دیا ہے۔

وزیراعظم آفس کے مطابق سکالرز وزارت منصوبہ بندی و ترقیات کے تحت پاکستان کو درپیش مسائل پر تحقیق کے لیے چھ ہفتوں کی انٹرن شپ کر رہے ہیں۔ اس موقع پر وزیراعظم نے پاکستان میں انٹرن شپ کے فیصلے کو خوش آئند قرار دیا۔

وزیراعظم نے کہا کہ دنیا بھر کی ممتاز جامعات میں زیر تعلیم پاکستانی طلبہ و طالبات ملک کا نام روشن کر رہے ہیں۔ انہوں نے حکومت کے اصلاحاتی ایجنڈے پر بریفنگ دی اور سکالرز کے سوالات کے جوابات دیئے۔

شہباز شریف نے کہا کہ ماضی میں ملک ڈیفالٹ کے قریب تھا لیکن ہنگامی معاشی اصلاحات کے ذریعے استحکام حاصل کیا گیا۔ انہوں نے محاصل میں اضافہ اور پیداواری صلاحیت میں بہتری کی اہمیت پر زور دیا۔

واضح رہے کہ اس ملاقات میں وفاقی وزراء، وزیر مملکت برائے خزانہ، قومی تعلیم و پیشہ ورانہ تربیت اور متعلقہ اداروں کے اعلیٰ افسران بھی شریک تھے۔