اسلام آباد: (رائیٹ ناؤنیوز) ملک میں مقامی سطح پر رجسٹرڈ فائیو جی موبائل فونز کی تعداد 38 لاکھ 10 ہزار تک پہنچ گئی ہے۔ پاکستان ٹیلی کمیونیکیشن اتھارٹی (پی ٹی اے) کے مطابق اپریل کے دوران 1 لاکھ 62 ہزار 40 فائیو جی موبائل فونز مقامی طور پر تیار کیے گئے۔

مئی تک مقامی سطح پر تیارکردہ فائیو جی ڈیوائسز کی تعداد 9 لاکھ 61 ہزار 326 تک پہنچ گئی ہے۔ دستاویز کے مطابق مقامی پیداوار سے صارفین کو نسبتاً کم قیمت پر فائیو جی اسمارٹ فونز دستیاب ہوں گے۔

مقامی سطح پر مختلف کمپنیوں کی جانب سے فائیو جی موبائل فونز تیار کیے جا رہے ہیں۔ فائیو جی سروس کے استعمال کے لیے صارفین کو مطابقت رکھنے والے ہینڈسیٹس درکار ہوں گے۔

بعض فائیو جی ڈیوائسز میں سروس فعال کرنے کے لیے سافٹ ویئر اپ ڈیٹ بھی ضروری ہوگا۔ اس سے صارفین کو جدید ٹیکنالوجی کے فوائد حاصل ہوں گے۔

واضح رہے کہ فائیو جی ٹیکنالوجی تیز رفتار انٹرنیٹ اور بہتر کنیکٹیویٹی کی سہولت فراہم کرتی ہے، جو مختلف شعبوں میں اہمیت کی حامل ہے۔