لاہور: (رائیٹ ناؤ نیوز) لاہور میں گندم اور آٹے کی قیمتوں میں اضافے کے باعث روٹی اور نان کی قیمتوں میں اضافہ کر دیا گیا ہے۔ تندور مالکان نے سرکاری ریٹ کی پرواہ نہ کرتے ہوئے روٹی کی قیمت میں 4 روپے اور نان کی قیمت میں 10 روپے اضافہ کر دیا ہے۔

نان بائی ایسوسی ایشن نے گندم کی قیمتوں میں اضافے کو جواز بنا کر روٹی کی قیمت 20 روپے اور نان 35 روپے کرنے کا اعلان کیا ہے۔ انہوں نے کہا کہ ان قیمتوں پر روکنے کی کوشش کی گئی تو احتجاجاً تندور بند کر دیں گے۔

ضلعی انتظامیہ نے قیمتوں میں اضافے پر تشویش کا اظہار کیا ہے۔ انہوں نے کہا ہے کہ عوام کو سستی روٹی سے محروم نہیں ہونے دیں گے اور قیمتوں میں یکطرفہ اضافے پر کارروائی ہوگی۔

یہ معاملہ عوام کی روزمرہ زندگی پر براہ راست اثرانداز ہو رہا ہے۔ روٹی کی قیمتوں میں اضافے کے باعث شہریوں کی مالی مشکلات میں اضافہ ہو رہا ہے۔

واضح رہے کہ کراچی کے مختلف علاقوں میں بھی روٹی کی قیمت میں اضافہ کیا گیا ہے، جہاں 20 روپے کی روٹی اب 25 روپے میں فروخت ہو رہی ہے۔