کراچی: (رائیٹ ناؤ نیوز) پاکستان میں مقامی کاٹن بیلٹس میں غیر معمولی ہیٹ ویو کے سبب کپاس کی پیداوار میں ریکارڈ کمی دیکھی گئی ہے۔ اس کمی کے باعث روئی کی درآمدات بڑھنے اور قیمتوں میں اضافے کے خدشات بڑھ گئے ہیں۔

چیئرمین کاٹن جنرز فورم احسان الحق نے بتایا کہ بلند درجہ حرارت اور پانی کی کمی کی وجہ سے کپاس کی فصل کو شدید خطرات لاحق ہیں۔ ان عوامل نے کپاس کی مجموعی پیداوار اور معیار کو متاثر کیا ہے اور درآمدات میں اضافے کا امکان ہے۔

محکمہ زراعت پنجاب نے کسانوں کو پانی کی مقدار میں کمی اور اجزائے صغیرہ کا اسپرے کرنے کی ہدایت کی ہے۔ یہ اقدامات ہیٹ ویو کے منفی اثرات کو کم کرنے میں مددگار ثابت ہوسکتے ہیں۔

جننگ فیکٹریوں میں کپاس کی آمد میں کمی کے باعث روئی اور پھٹی کی قیمتوں میں تیزی دیکھی جا رہی ہے۔ پنجاب میں روئی کی قیمت 18 ہزار 200 روپے جبکہ سندھ میں 17 ہزار 700 روپے تک پہنچ گئی ہے۔

واضح رہے کہ وفاقی بجٹ میں کاٹن انڈسٹری پر عائد سیلز ٹیکس کی شرح میں ریلیف نہ ملنے سے کچھ جننگ فیکٹریاں غیر فعال ہوگئی ہیں۔ مزید ٹیکسٹائل ملوں کے غیر فعال ہونے کے باعث بے روزگاری میں اضافے کا خدشہ ہے۔