اسلام آباد: (رائیٹ ناؤ نیوز) سینیٹ کی قائمہ کمیٹی برائے داخلہ نے سابق اراکین پارلیمنٹ، ان کی اہلیہ اور بچوں کو مفت بلیو پاسپورٹ دینے کا بل منظور کرلیا۔ کمیٹی میں سینیٹر عبدالقادر نے ‘دی ممبرز آف پارلیمنٹ (سیلریز اینڈ الاؤنسز) ترمیمی ایکٹ 2026’ پیش کیا، جو منظور کرلیا گیا۔

ترمیمی ایکٹ کے مطابق سابق اراکین پارلیمنٹ کو مفت آفیشل (بلیو) پاسپورٹ کا حق دیا جائے گا۔ اس میں واضح کیا گیا ہے کہ سابق اراکین کی اہلیہ اور 28 سال سے کم عمر کے زیرکفالت بچے بھی اس سہولت کے اہل ہوں گے۔

حکومت نے واضح کیا ہے کہ یہ سہولت پہلے سے ریٹائرڈ وفاقی سیکرٹریز کو حاصل ہے، اور اب سابق اراکین پارلیمنٹ کو بھی اس کے مساوی لایا گیا ہے۔

یہ بل خیبر پختونخوا اسمبلی میں تین ماہ قبل منظور کیے گئے ترمیمی ایکٹ کا حصہ ہے، جو ارکان اسمبلی کی مراعات اور الاؤنسز سے متعلق ہے۔

یاد رہے کہ اس ترمیمی ایکٹ کا مقصد سابق اراکین پارلیمنٹ کو ریٹائرڈ وفاقی سیکرٹریز کے مساوی حقوق دینا ہے تاکہ ان کے حقوق اور مراعات میں اضافہ ہوسکے۔