پشاور: (رائیٹ ناؤ نیوز) وفاقی وزیر مملکت برائے داخلہ طلال چودھری نے خیبرپختونخوا اسمبلی کے حالیہ مراعاتی بل کو مضحکہ خیز قرار دیتے ہوئے کہا ہے کہ یہ پی ٹی آئی کی دوہرے معیار کی مثال ہے۔

طلال چودھری نے کہا کہ پی ٹی آئی نے اپنے ارکان کے لیے سیاسی رشوت کے طور پر مراعاتی بل منظور کیا۔ بل میں تاحیات بلیو پاسپورٹ، ٹول ٹیکس سے استثنا اور سرکاری ریسٹ ہاؤسز میں مفت قیام شامل ہیں۔

ان کا کہنا تھا کہ پی ٹی آئی دعویٰ کرتی ہے کہ وی آئی پی کلچر ختم کرے گی، مگر عملی طور پر اپنے لیے مراعات جمع کر رہی ہے۔ انہوں نے کہا کہ ماضی میں کسی بھی اسمبلی نے ایسی قانون سازی نہیں کی۔

طلال چودھری نے مزید کہا کہ ایک پی ٹی آئی رہنما نے سرکاری ہیلی کاپٹر کو موٹرسائیکل کی طرح استعمال کیا۔ انہوں نے اقبال آفریدی اور ان کے بیٹے کے بلیو پاسپورٹ کے غلط استعمال کا بھی دعویٰ کیا۔

یاد رہے کہ موجودہ حکومت نے ممنوعہ بور کے اسلحہ لائسنس میں 85 فیصد اور غیر ممنوعہ میں 60 سے 65 فیصد تک کمی کی ہے۔ پی ٹی آئی کی احتساب کی باتیں اس کی عملی سیاست سے متضاد ہیں۔