تہران: (رائیٹ ناؤ نیوز) ایران نے آبنائے ہرمز سے گزرنے والے ہر جہاز پر فیس عائد کرنے کا اعلان کیا ہے۔ ایرانی سفیر عبدالرضا رحمانی فضلی نے چین میں ورلڈ پیس فورم سے خطاب کرتے ہوئے کہا کہ دوست ممالک کو خصوصی رعایت دی جائے گی۔

ایرانی سفیر نے واضح کیا کہ عمان کے ساتھ مل کر آبنائے ہرمز کی حفاظت کیلئے نئے انتظامات کیے جا رہے ہیں۔ ان کا کہنا تھا کہ یہ فیس ٹال نہیں ہوگی بلکہ نئے اقدامات کے تحت وصول کی جائے گی۔

ایران کے مطابق آبنائے ہرمز کی سیکیورٹی میں اضافہ کیا جا رہا ہے، اور غیر ملکی قوتوں کو اس حوالے سے خبردار کیا گیا ہے۔ نائب وزیر خارجہ کاظم غریب آبادی نے کہا کہ یہ آبی گزرگاہ غیر علاقائی طاقتوں کی فوجی سرگرمیوں کے لیے نہیں ہے۔

یہ اقدامات ماحولیاتی آلودگی کو کم کرنے اور گزرنے والے جہازوں کی نگرانی کو بہتر بنانے کے لیے کیے جا رہے ہیں۔ ایران نے دعویٰ کیا کہ ان کا ملک سلامتی کی ذمہ داری پورا کر رہا ہے۔

واضح رہے کہ آبنائے ہرمز بحری تجارت کے لیے انتہائی اہمیت کی حامل ہے اور ایران نے اس کی سلامتی کو ساحلی ریاستوں کی ذمہ داری قرار دیا ہے۔