چلی: (رائیٹ ناؤ نیوز) دنیا کے سب سے بڑے ڈیجیٹل کیمرہ نے کائنات کی حیران کن تصاویر لینا شروع کر دی ہیں۔ ویرا سی روبن آبزرویٹری نے کائنات کے سروے کا آغاز باضابطہ طور پر کر دیا ہے۔

غیرملکی میڈیا کے مطابق، یہ دوربین چلی کی ایک پہاڑی کی چوٹی پر موجود ہے اور اگلے 10 سالوں تک ہر رات تصاویر لے گی۔ محققین کو امید ہے کہ روبن کے مشاہدات سے کائنات کی مردم شماری میں مدد ملے گی۔

آبزرویٹری کے ڈپٹی ڈائریکٹر فل مارشل نے کہا ہے کہ دنیا بھر کے سائنسدان اس ڈیٹا سیٹ کے ساتھ کام کرتے ہوئے کائنات کا مطالعہ کریں گے۔ روبن کی پہلی تصاویر میں زمین سے ہزاروں نوری سال دور ‘ٹرائیفڈ اور لیگون نیبولا’ کی تصاویر شامل تھیں۔

ان تصاویر سے سائنسدانوں کو یہ سمجھنے میں مدد مل سکتی ہے کہ کہکشائیں اربوں سالوں میں کیسے بنتی اور اکٹھی ہوتی ہیں۔ کائنات کے وجود کی تفہیم میں یہ تصاویر اہم کردار ادا کر سکتی ہیں۔

یاد رہے کہ ایک نوری سال تقریباً 6 ٹریلین میل (9.7 ٹریلین کلومیٹر) کے برابر ہوتا ہے۔ روبن کی تصاویر کائنات کی ساخت اور تاریخ کے بارے میں اہم معلومات فراہم کر سکتی ہیں۔