اسلام آباد: (رائیٹ ناؤ نیوز) بلاول بھٹو زرداری نے کہا ہے کہ سندھ طاس معاہدے کی بحالی کے بغیر بھارت کے ساتھ پائیدار امن ممکن نہیں۔ انہوں نے مزید کہا کہ پاکستان امن کا خواہاں ہے مگر آبی مسائل حل کیے بغیر یہ ممکن نہیں۔

پیپلز پارٹی کے چیئرمین بلاول بھٹو نے کہا کہ پانی محض جغرافیہ نہیں بلکہ خوراک اور زندگی کا سوال ہے۔ انہوں نے کہا کہ دنیا نے تسلیم کیا ہے کہ آبی وسائل عالمی سیاست اور سلامتی کا مرکزی مسئلہ بن چکے ہیں۔

بلاول بھٹو نے بیان دیا کہ دریائے سندھ کا پانی پاکستان کی بقا اور معیشت کی ضمانت ہے۔ انہوں نے کہا کہ آبی وسائل کو ہتھیار بنانا عالمی امن کے لیے خطرناک ہے۔

انہوں نے کہا کہ پاکستان نے جنگ بندی کی شرائط پر عمل کیا مگر بھارت نے وعدوں کی پاسداری نہیں کی۔ بلاول بھٹو نے کہا کہ پاکستان کے حصے کے پانی کا تحفظ یقینی بنایا جائے۔

واضح رہے کہ سندھ طاس معاہدہ پاکستان اور بھارت کے درمیان 1960 میں طے پایا تھا۔ اس معاہدے کے تحت پاکستان کو دریائے سندھ، جہلم اور چناب کے پانی پر حقوق ملے تھے۔