اسلام آباد: (رائیٹ ناؤ نیوز) بانی پی ٹی آئی عمران خان کی بہن علیمہ خان نے فائز عیسیٰ پر منصب سے غداری کے الزامات لگائے ہیں۔ انہوں نے کہا کہ آج قاضی فائز عیسیٰ کا انٹرویو دیکھا جس سے مزید واضح ہوا کہ ان کو اپنی غلطی کا احساس نہیں ہے۔

علیمہ خان نے اسلام آباد ہائیکورٹ کے باہر میڈیا سے گفتگو کرتے ہوئے کہا کہ عمران خان نے 26 ویں ترمیم کے خلاف احتجاج کو ظلم قرار دیا تھا۔ ہفتے میں 18 لوگ بانی پی ٹی آئی سے مل سکتے ہیں مگر اس کی اجازت نہیں دی جا رہی۔ ہم ججز سے ملاقات کی اجازت کے لیے منتیں کر رہے ہیں۔

انہوں نے کہا کہ حکومت کا ارادہ ہے کہ ایک بہن کو ملاقات کی اجازت دے کر عمران خان کو چھ ماہ تک قید تنہائی میں رکھا جائے۔ ساتھ کوئی حکومتی نمائندہ بھیجا جائے گا تاکہ باتیں باہر آ سکیں اور مزید سختیاں کی جا سکیں۔

علیمہ خان نے مزید کہا کہ ہم بانی پی ٹی آئی کے تمام حقوق کی بحالی چاہتے ہیں۔ ان کو کتابیں ملنی چاہئیں اور فیملی و بچوں سے ملاقات ہونی چاہیے۔

یاد رہے کہ عمران خان کو مختلف مقدمات میں ملوث ہونے کے باعث قید کیا گیا ہے اور ان کے حقوق کی بحالی کے لیے ان کے خاندان کی جانب سے کوششیں جاری ہیں۔