اسلام آباد: (رائیٹ ناؤنیوز) چئیرمین تحریک انصاف بیرسٹر گوہر علی خان نے کہا ہے کہ عالمی مارکیٹ میں پیٹرول کی قیمتوں میں 3 فیصد اضافہ ہوا تو حکومت نے 20 فیصد قیمتیں بڑھا دیں۔ ان کا کہنا تھا کہ پیٹرولیم کی عالمی قیمتوں میں 17 فیصد اضافہ ہونے پر حکومت نے 55 فیصد قیمتیں بڑھا دیں۔

بیرسٹر گوہر نے حکومت پر زور دیا کہ عوام کے ساتھ سنجیدگی اختیار کرے اور قیمتوں کے اعدادوشمار درست پیش کرے۔ انہوں نے کہا کہ پیٹرول کی قیمتیں فروری کی قیمتوں پر واپس آنی چاہئیں۔

انہوں نے امریکہ اور ایران کے معاہدے کو خوش آئند قرار دیا اور کہا کہ اس معاہدے پر عمل درآمد ہونا چاہیے۔ ان کا کہنا تھا کہ امریکہ سے توقع ہے کہ وہ معاہدے پر عمل درآمد کرائے گا۔

بیرسٹر گوہر نے کہا کہ پہلے بھی غزہ امن معاہدہ ہوا تھا لیکن حملے جاری رہے۔ امید ہے کہ پاکستان اب معاملات کو بہتر رکھنے پر نظر رکھے گا۔

واضح رہے کہ عالمی مارکیٹ میں پیٹرول کی قیمتوں میں اضافے کے باعث مختلف ممالک میں پیٹرول کی قیمتوں میں اضافہ دیکھنے میں آیا ہے، جس کے باعث عوام کو مشکلات کا سامنا کرنا پڑ رہا ہے۔