لاہور میں چمگادڑوں کی تعداد میں کمی شہری آبادیوں کے پھیلاؤ اور درختوں کی کٹائی کا نتیجہ ہے، جس سے ماحولیاتی نظام متاثر ہو سکتا ہے۔
لاہور: (رائیٹ ناؤ نیوز) لاہور میں چمگادڑوں کی تعداد میں کمی واقع ہو رہی ہے۔ ماہرین نے شہری آبادیوں کے پھیلاؤ اور درختوں کی کٹائی کو اس کا ذمہ دار قرار دیا ہے۔
لاہور کے باغ جناح میں چمگادڑوں کی بڑی تعداد موجود تھی جو شام کے وقت خوراک کی تلاش میں نکلتی تھیں۔ تاہم، اب ماہرین نے ان کی تعداد میں واضح کمی ریکارڈ کی ہے۔
ماہر جنگلی حیات شاہ زیب خورشید کے مطابق، اربنائزیشن اور تعمیراتی سرگرمیوں نے چمگادڑوں کے مسکنوں کو ختم کیا ہے۔ انہوں نے کہا کہ شہری سرگرمیوں میں اضافے نے چمگادڑوں کے لیے موزوں ماحول محدود کر دیا ہے۔
عوامی سطح پر پائی جانے والی غلط فہمیاں بھی چمگادڑوں کی آبادی میں کمی کی ایک وجہ ہیں۔ بعض لوگ چمگادڑوں کو منحوس سمجھتے ہیں، حالانکہ ماہرین کے مطابق یہ انسانوں کے لیے بے ضرر ہیں۔
واضح رہے کہ چمگادڑیں ماحولیاتی توازن برقرار رکھنے میں اہم کردار ادا کرتی ہیں۔ اگر ان کی تعداد میں مزید کمی ہوئی تو اس کے اثرات پورے ماحولیاتی نظام پر مرتب ہو سکتے ہیں۔
