اسلام آباد: (رائیٹ ناؤ نیوز) دفتر خارجہ کے ترجمان نے کہا ہے کہ ایران پر حملے کے لیے فضائی حدود کے حوالے سے کوئی امریکی مطالبہ نہیں آیا۔ انہوں نے واضح کیا کہ پاکستان کی فضائی حدود کے استعمال کا کوئی سوال نہیں پیدا ہوتا۔

ترجمان نے بتایا کہ وزیراعظم شہباز شریف 23 سے 26 مئی تک چین کے دورے پر جائیں گے۔ اس دورے میں وہ چینی قیادت سے ملاقاتیں کریں گے اور دوطرفہ تعلقات کو مزید وسعت دیں گے۔

ترجمان طاہر اندرابی نے کہا کہ پاکستان اور چین کے درمیان 75 سالہ سفارتی تعلقات منائے جا رہے ہیں۔ چین پاکستان کا قابل اعتماد دوست اور اسٹریٹیجک پارٹنر ہے، جس نے ہر مشکل میں پاکستان کا ساتھ دیا۔

انہوں نے مزید کہا کہ پاک چین دوستی خطے میں استحکام کی ضامن ہے۔ دونوں ممالک معاشی، دفاعی اور سفارتی محاذوں پر گہری شراکت داری کے ساتھ آگے بڑھ رہے ہیں۔

واضح رہے کہ پاکستان نے مشرق وسطیٰ میں کشیدگی کم کرنے کی کوششوں کے تحت امیر قطر سے رابطہ کیا ہے۔ پاکستان نے امید ظاہر کی ہے کہ خطے میں پرتشدد واقعات دوبارہ نہیں ہوں گے۔