لندن: (رائیٹ ناؤ نیوز) برطانیہ کے وزیراعظم کیئر اسٹارمر نے روسی جیٹ فیول اور ڈیزل کی پابندیوں میں نرمی کے فیصلے کا دفاع کیا ہے۔ انہوں نے کہا ہے کہ یہ اقدام برطانوی عوام کو بڑھتی ہوئی توانائی قیمتوں سے بچانے کے لیے کیا گیا ہے۔

برطانوی حکومت نے ایک نیا تجارتی اجازت نامہ جاری کیا ہے جس کے تحت روسی خام تیل سے تیار کردہ جیٹ فیول اور ڈیزل تیسرے ممالک میں ریفائن ہونے کے بعد برطانیہ درآمد کیا جا سکے گا۔ یہ اجازت نامہ غیر معینہ مدت کے لیے جاری کیا گیا ہے۔

محکمہ تجارت نے بتایا ہے کہ اس لائسنس کا وقتاً فوقتاً جائزہ لیا جائے گا۔ حکومت نے بعض روسی پلانٹس سے نکلنے والی مائع قدرتی گیس پر بھی عارضی نرمی کی ہے۔

وزیراعظم کیئر اسٹارمر کے مطابق یہ دونوں لائسنس محدود مدت اور مخصوص حالات کے لیے جاری کیے گئے ہیں تاکہ برطانوی صارفین کو شدید مہنگائی سے بچایا جا سکے۔

یاد رہے کہ روس کے 2022 میں یوکرین پر حملے کے بعد برطانیہ نے روس کے خلاف سخت پابندیاں عائد کی تھیں جن میں تیل کی برآمدات اور ہزاروں روسی افراد و کمپنیوں پر پابندیاں شامل تھیں۔