تہران: (رائیٹ ناؤ نیوز) ایرانی وزارت خارجہ کے ترجمان اسماعیل بقائی نے بتایا ہے کہ امریکا کی جانب سے نئی تجاویز موصول ہوئی ہیں۔ ایران ان تجاویز کا تفصیلی جائزہ لے رہا ہے جبکہ پاکستانی ثالثی کے ذریعے مذاکرات جاری ہیں۔

ترجمان نے میڈیا بریفنگ میں کہا ہے کہ ایران اپنے حقوق کا مطالبہ کر رہا ہے۔ ان حقوق میں ایران پر عائد امریکی پابندیوں کا خاتمہ شامل ہے۔

ترجمان کے مطابق امریکا کو اپنی نیک نیتی ثابت کرنی ہوگی اور ایرانی بحری جہازوں کے خلاف کارروائیاں بند کرنا ہوں گی جنہیں ایران ‘بحری قزاقی’ قرار دیتا ہے۔

ایران اور امریکا کے درمیان پیغامات کا تبادلہ 14 نکات کی بنیاد پر جاری ہے۔ پاکستان اس سفارتی عمل میں اہم ثالثی کردار ادا کر رہا ہے۔

واضح رہے کہ ایران، عمان اور بین الاقوامی اداروں کے ساتھ مل کر آبنائے ہرمز کی سلامتی کیلئے پروٹوکول تیار کرنے کا خواہاں ہے تاکہ تجارتی اور تیل بردار جہازوں کی نقل و حرکت محفوظ ہو سکے۔