اسلام آباد: (رائیٹ ناؤ نیوز) بجٹ 2026-27 کے حوالے سے وزارت خزانہ اور آئی ایم ایف کے درمیان مذاکرات جاری ہیں۔ حکام نے پہلے سے جاری ترقیاتی منصوبوں کو مکمل کرنے کی یقین دہانی کرائی ہے۔ وفاق اور صوبوں میں سرکاری پروکیورمنٹ کے لیے آن لائن نظام نافذ کیا جائے گا۔

حکومت نے نئے ترقیاتی منصوبوں کے لیے محدود مالی گنجائش کا اعتراف کرلیا ہے۔ پبلک پرائیویٹ پارٹنرشپ کے تحت منصوبوں کی مالی ذمہ داریاں 472 ارب روپے تک پہنچ گئی ہیں۔ نئے منصوبوں کے لیے 10 فیصد سے کم فنڈز مختص کرنے کی تجویز ہے۔

وزارت خزانہ کے حکام نے بتایا کہ نئے بجٹ میں پچھلے مالی سال کے اصل ہدف سے کم فنڈز مختص کیے جائیں گے۔ صرف 986 ارب روپے مختص کیے جا سکتے ہیں۔ آئی ایم ایف نے بجٹ رپورٹس میں خرچ کی وجوہات شامل کرنے کی تاکید کی ہے۔

دستاویز کے مطابق 150 ارب روپے سے زائد کا بیلنس مرکزی نظام کا حصہ بنے گا۔ سرکاری خریداری کے عمل کو شفاف بنانے کے لیے ای پیڈز سسٹم متعارف کروایا جا رہا ہے۔ سرکاری ٹھیکوں میں خصوصی رعایت ختم کرنے کے لیے قوانین میں تبدیلی کی جائے گی۔

یاد رہے کہ 2026 کے آخر تک تمام وفاقی اداروں کو ای پیڈز سے منسلک کرنے کا ہدف مقرر کیا گیا ہے۔ پبلک پرائیویٹ پارٹنرشپ منصوبوں کے مالی خطرات کی نگرانی کا نیا نظام متعارف کروایا جا رہا ہے۔