برلن: (رائیٹ ناؤ نیوز) جرمن چیف آف ڈیفنس کارسٹن بریور نے خبردار کیا ہے کہ روس 2029 تک نیٹو پر حملہ کر سکتا ہے۔ ان کا کہنا ہے کہ روس کی دوبارہ اسلحہ سازی اور اقتصادی و سیاسی تبدیلیاں خطرے کی نشاندہی کرتی ہیں۔

میڈیا رپورٹس کے مطابق کارسٹن بریور نے ایک مقامی اخبار کو بتایا کہ روس کی جانب سے اہلکاروں کی تعداد میں اضافہ اور دیگر اقدامات نیٹو کے لیے خطرہ ہیں۔ انہوں نے کہا کہ نیٹو کو فوری طور پر اپنی فوجی تیاریوں کو مضبوط کرنا چاہیے۔

بریور نے نیٹو سے 2029 تک اپنی فوجی صلاحیتوں کو بڑھانے کی اپیل کی اور کہا کہ 2035 تک تکنیکی برتری حاصل کرنا ضروری ہے۔ انہوں نے مزید کہا کہ روسی خطرہ بڑھ رہا ہے اور نیٹو کو تیار رہنا چاہیے۔

انہوں نے کہا کہ روس یوکرین میں جنگی تجربات حاصل کر رہا ہے اور اس کی ٹیکنالوجی میں بہتری آ رہی ہے۔ روسی صدر پوٹن کی جانب سے خود مختار ریاستوں پر حملے کی آمادگی ظاہر کی گئی ہے۔

یاد رہے کہ اسٹونین انٹیلی جنس نے اپنی رپورٹ میں کہا ہے کہ روس اس سال یا اگلے سال نیٹو کے کسی رکن پر حملہ نہیں کرے گا، لیکن یورپ اپنی افواج کو مضبوط بنا رہا ہے۔