لاہور: (رائیٹ ناؤ نیوز) وزیراعلی پنجاب مریم نوازشریف نے پاک چین سفارتی تعلقات کے 75 سال مکمل ہونے پر شاندار تقریب کی ہدایت دی ہے۔ یہ تقاریب 21 اور 25 مئی کو منعقد ہوں گی۔

پنجاب کی سینئر وزیر مریم اورنگزیب نے چین کے لاہور میں قونصل جنرل سن یان سے ملاقات کی اور چین کے وفد کا خیرمقدم کیا۔ انہوں نے وزیراعلی کی طرف سے چین کی عوام کے لیے نیک تمنائیں بھی پیش کیں۔

دونوں رہنماؤں نے مختلف شعبوں میں دوطرفہ تعاون کا جائزہ لیا اور مستقبل کے منصوبوں پر تبادلہ خیال کیا۔ مریم اورنگزیب نے بتایا کہ 21 مئی کو تین روزہ نمائش ہوگی جبکہ 25 مئی کو بڑی تقریب ہوگی۔

انہوں نے کہا کہ چین کے تجربات سے پنجاب کی ترقی میں مدد مل رہی ہے۔ 75 سالہ تعلقات دونوں ممالک کی دوستی کا روشن باب ہیں۔

یاد رہے کہ چین کے صوبے زی جیانگ اور پنجاب کے درمیان دوستی سے تجارت بڑھے گی۔ پنجاب حکومت چین کے ساتھ ٹورازم اور ماحول کی بحالی پر کام کر رہی ہے۔