لاہور: (رائیٹ ناوٴ نیوز)۔ لاہور کے علاقے سندر میں ریسٹورنٹ رائیڈر کی مبینہ ڈکیتی کی واردات کا ڈراپ سین ہو گیا ہے۔ پولیس نے تحقیقات کے بعد واقعے کو من گھڑت قرار دیتے ہوئے ملزم احسان کو ساتھیوں سمیت گرفتار کر لیا ہے۔

پولیس کے مطابق تھانہ سندر میں ایمرجنسی ہیلپ لائن 15 پر ڈکیتی کی اطلاع دی گئی تھی۔ اطلاع میں دعویٰ کیا گیا تھا کہ نامعلوم ملزمان نے گن پوائنٹ پر 3 لاکھ 46 ہزار روپے، موبائل فون اور پرس چھین لیا ہے۔

ترجمان ڈی آئی جی آپریشنز نے بتایا کہ ابتدائی تفتیش میں واقعہ بے بنیاد ثابت ہوا۔ ملزم احسان، جو ریسٹورنٹ رائیڈر ہے، نے رقم خردبرد کرنے کے لیے اپنے ساتھیوں کے ساتھ ڈرامہ رچایا تھا۔

پولیس نے کارروائی کرتے ہوئے احسان کو اس کے ساتھیوں احمد اعجاز اور حسنین سمیت گرفتار کر لیا ہے۔ ملزمان کے خلاف مقدمہ درج کر کے قانونی کارروائی شروع کر دی گئی ہے۔

واضح رہے کہ ایمرجنسی نمبر 15 پر جھوٹی کال کرنا قانوناً جرم ہے۔ پولیس نے شہریوں کو خبردار کیا ہے کہ صرف حقیقی ہنگامی صورتحال میں ہی اس نمبر کا استعمال کیا جائے۔