ننگبو: (رائیٹ ناوٴ نیوز) پاکستان کے سفیر خلیل ہاشمی نے 14 اپریل کو چین کے شہر ننگبو کا دورہ کیا۔ اس دورے کا مقصد پاکستان کے لیے کاروباری سرمایہ کاری اور صنعتی تعاون کو بڑھانا تھا۔

سفیر ہاشمی نے پاک چین ننگبو صنعتی تعاون سربراہ اجلاس سے خطاب کیا۔ انہوں نے معلوماتی ٹیکنالوجی اور دواسازی کے شعبوں میں کاروباری سرمایہ کاری مذاکرات میں شرکت کی۔

اپنے خطاب میں ہاشمی نے پاکستان کے محل وقوع اور کم لاگت افرادی قوت کی اہمیت پر زور دیا۔ انہوں نے چینی سرمایہ کاروں کے لیے حکومتی سہولیات کی فراہمی کی یقین دہانی کرائی۔

سفیر خلیل ہاشمی نے آئی بی آئی گروپ کے اسلام آباد میں علاقائی دفتر قائم کرنے کے فیصلے کا خیر مقدم کیا۔ انہوں نے ننگبو کی کمپنیوں کو بھی دعوت دی کہ وہ 8 سے 14 مئی تک پاکستان آنے والے کاروباری وفد میں شامل ہوں۔

ِصنعتی تعاون سربراہ اجلاس میں گھریلو آلات، معلوماتی ٹیکنالوجی، کیمیکل اور ٹیکسٹائل شعبوں سے 100 چینی اداروں نے شرکت کی۔ دونوں کاروباری نشستوں میں بھی قریب 2 درجن نمایاں کمپنیوں کے نمائندے شریک ہوئے۔

واضح رہے کہ ننگبو چین کے صوبہ ژے جیانگ کا ایک اہم ساحلی شہر ہے۔ یہ شہر جدت، صنعت اور کاروباری سرگرمیوں کے بڑے مرکز کے طور پر جانا جاتا ہے۔