پشاور: (رائیٹ ناوٴ نیوز) خیبرپختونخوا میں انسولین سمیت 7 ادویات کی قیمتوں میں اضافہ کر دیا گیا ہے۔ ذیابیطس کے علاج میں استعمال ہونے والی انسولین کی قیمت دوگنی ہو گئی ہے، جبکہ انسولین انجیکشن ڈیوائس کی قیمت 2200 سے بڑھ کر 4 ہزار 720 روپے ہو گئی ہے۔

اسی طرح بدہضمی اور تیزابیت کی دوا کے پیک کی قیمت 530 سے بڑھا کر 620 روپے کر دی گئی ہے۔ وٹامنز اور غذائی سپلیمنٹ کی گولیوں کی قیمت 480 سے بڑھا کر 510 روپے مقرر کی گئی ہے۔

مزید بتایا گیا کہ وٹامن بی کی کمی دور کرنے والی دوا کی قیمت 500 سے بڑھا کر 600 روپے کر دی گئی ہے۔ تھائیرائڈ کے علاج میں استعمال ہونے والی دوا کی قیمت 85 سے بڑھا کر 290 روپے مقرر کی گئی ہے، جبکہ ٹائیفائیڈ کے علاج میں استعمال ہونے والی دوا کی قیمت 805 سے بڑھا کر 930 روپے ہو گئی ہے۔

حکام کا کہنا ہے کہ صوبے میں دیگر متعدد جان بچانے والی ادویات کی قیمتیں بھی بڑھ گئی ہیں۔ ادویات کی قیمتوں میں اضافے سے عوام میں تشویش کی لہر دوڑ گئی ہے۔

یاد رہے کہ خیبرپختونخوا میں ادویات کی قیمتوں میں اضافہ پہلے بھی موضوع بحث رہا ہے۔ اس بار بھی یہ اقدام عوام کے لیے مشکلات کا باعث بن رہا ہے۔