اسلام آباد: (رائیٹ ناوٴ نیوز) نائب وزیراعظم اسحاق ڈار نے چینی وزیر خارجہ وانگ ژی سے ٹیلی فون پر گفتگو کی، جس میں امریکا اور ایران کے درمیان اسلام آباد میں ہونے والے مذاکرات پر تبادلہ خیال کیا گیا۔ دونوں رہنماؤں نے قریبی رابطے میں رہنے کا عزم کیا۔

ترجمان دفتر خارجہ نے بتایا کہ چینی وزیر خارجہ نے خطے میں پاکستانی کوششوں کو سراہا اور پاکستان کی تعمیری سفارتکاری کے لیے چین کی حمایت کا اعادہ کیا۔ اسحاق ڈار نے مذاکرات اور سفارتکاری کے مستقل عزم کو دہراتے ہوئے کہا کہ بات چیت ہی آگے بڑھنے کا واحد راستہ ہے۔

دونوں رہنماؤں کے درمیان پاک چین پانچ نکاتی امن اقدامات پر بھی گفتگو ہوئی۔ انہوں نے کہا کہ ان اقدامات کا مقصد مسائل کے پرامن حل میں سہولت فراہم کرنا ہے۔ نائب وزیراعظم نے اسلام آباد میں چینی سفیر جیانگ زائی ڈونگ سے بھی ملاقات کی۔

چینی سفیر نے امریکا ایران مذاکرات میں پاکستان کے کردار کی تعریف کی۔ ملاقات میں پاکستان اور چین کے تعلقات کو مزید مضبوط بنانے کے عزم کا اعادہ کیا گیا۔

واضح رہے کہ پاکستان نے ہمیشہ خطے میں امن و استحکام کے لیے کردار ادا کیا ہے، اور چین کی حمایت اس حوالے سے اہمیت کی حامل رہی ہے۔