بغداد: (رائیٹ ناوٴ نیوز) عراق کے دارالحکومت بغداد میں ایک امریکی خاتون صحافی شیلی کٹلسن کو اغوا کر لیا گیا ہے۔ عراقی سیکیورٹی فورسز نے اس واقعے کے بعد بڑے پیمانے پر سرچ آپریشن شروع کر دیا ہے۔

عراقی وزارتِ داخلہ نے اس اغوا کی تصدیق کی ہے، تاہم صحافی کی شہریت کے بارے میں مزید معلومات فراہم نہیں کی گئیں۔ حکام کا کہنا ہے کہ اغوا ہونے والی خاتون امریکی شہری ہیں۔

واقعہ بغداد کی سعدون اسٹریٹ پر پیش آیا جہاں سے مسلح افراد نے خاتون کو اغوا کیا۔ رپورٹ کے مطابق اغوا کار دو گاڑیوں میں سوار تھے اور بابل صوبے کی طرف فرار ہو رہے تھے۔ تعاقب کے دوران ایک گاڑی الٹ جانے پر ایک مشتبہ شخص پکڑا گیا۔

عراقی فورسز نے چیک پوسٹوں کو الرٹ کر دیا ہے اور اغوا کاروں کی تلاش جاری ہے۔ امریکی وزیرِ خارجہ کے معاون کا کہنا ہے کہ مشتبہ شخص کا تعلق ایران نواز ملیشیا سے ہو سکتا ہے۔

واضح رہے کہ عراق میں غیر ملکیوں کے اغوا کے واقعات ماضی میں بھی پیش آتے رہے ہیں۔ 2023 میں پرنسٹن کی طالبہ الزبتھ تسورکوف بھی بغداد سے لاپتہ ہوئی تھیں۔