اسلام آباد: (رائیٹ ناوٴ نیوز) ایرانی سفارت خانہ نے سوشل میڈیا پر گردش کرنے والے HosseinNejat1@ نامی اکاؤنٹ کو مکمل طور پر جعلی قرار دیا ہے۔ سفارتخانے نے کہا ہے کہ اس کا ایران کے کسی سرکاری ادارے سے کوئی تعلق نہیں۔

سفارتخانے نے پاکستان پر لگائے گئے بے بنیاد الزامات کو جھوٹا اور گمراہ کن قرار دیتے ہوئے سختی سے مسترد کیا ہے۔ بیان میں کہا گیا کہ جعلی اکاؤنٹ نے پاکستان پر الزام لگایا کہ وہ آبنائے ہرمز کے ذریعے تیل کی ترسیل کر رہا ہے، جو حقیقت سے بالکل عاری ہے۔

حکام نے زور دیا کہ مذکورہ اکاؤنٹ کا مقصد پاکستان اور ایران کے درمیان دوستانہ تعلقات کو نقصان پہنچانا ہے۔ انہوں نے واضح کیا کہ ایسی سرگرمیاں دونوں ممالک کے تعلقات کو متاثر نہیں کر سکتیں۔

سفارتخانے نے عوام سے اپیل کی کہ وہ غیر مصدقہ اکاؤنٹس اور معلومات کو شیئر کرنے سے گریز کریں اور صرف مستند ذرائع پر اعتماد کریں۔

واضح رہے کہ پاکستان اور ایران کے درمیان مذہبی، ہمسایہ اور تاریخی بنیادوں پر قائم تعلقات کسی بھی سازش سے کمزور نہیں ہوں گے۔