مسقط: (رائیٹ ناوٴ نیوز) عمان کی وزارت محنت نے 7 دسمبر 2025 کو توانائی اور کان کنی کے شعبوں میں متعدد پیشوں کے لیے لازمی لائسنسنگ سسٹم کا اعلان کیا ہے۔ وزارت کے مطابق ان شعبوں میں کام کرنے والے افراد اور اداروں کو مخصوص پیشہ ورانہ لائسنس حاصل کرنا ہوگا، جس کی نگرانی عمانی ایسوسی ایشن فار انرجی اینڈ مائننگ اسکلز کرے گی۔

وزارت نے وضاحت کی کہ جن پیشوں کے لیے لائسنس لازمی قرار دیا گیا ہے، ان کی فہرست جاری کر دی گئی ہے۔ تمام کمپنیوں اور ملازمین کو یکم جون 2026 تک اصلاحی مدت دی گئی ہے جس دوران ورک پرمٹ کی تجدید یا اجراء ممکن ہوگا، چاہے ملازمین نے لائسنس کے لیے درخواست نہ دی ہو۔

یکم جون 2026 کے بعد ورک پرمٹ صرف اسی صورت میں جاری یا تجدید ہوسکے گا جب کارکن کے پاس سیکٹر اسکلز یونٹ برائے توانائی و کان کنی کا لائسنس موجود ہو۔ حکومت کا کہنا ہے کہ یہ اقدام ملکی افرادی قوت کی مہارت بڑھانے، لیبر مارکیٹ کو منظم کرنے اور پیشہ ورانہ معیار برقرار رکھنے کے لیے ضروری ہے۔

لائسنس درکار پیشوں میں HSE ایڈوائزر، موبائل کرین آپریٹر، فورک لفٹ آپریٹر، ویلڈر، مکینکل و الیکٹرکل ٹیکنیشنز، اور دیگر تکنیکی اسامیاں شامل ہیں۔ وزارت نے اداروں کو ہدایت کی کہ لائسنسنگ کی مقررہ تاریخوں پر عمل کریں تاکہ کاروباری سرگرمیاں جاری رہ سکیں۔ مزید معلومات کے لیے وزارت کا ہیلپ سینٹر 80077000 پر رابطہ کیا جا سکتا ہے۔