واشنگٹن: (رائیٹ ناوٴ نیوز) یوکرین کے لیے امریکی حمایت یافتہ 28 نکاتی امن منصوبہ ایک نیا تنازعہ بن گیا ہے، کیونکہ یہ روس کی جانب سے دی گئی تحریر سے ماخوذ بتایا جا رہا ہے۔

یہ انکشاف ہوا ہے کہ اکتوبر میں ٹرمپ انتظامیہ کو دی گئی ایک روسی دستاویز سے یہ منصوبہ تیار کیا گیا تھا، جس میں ماسکو کی شرائط شامل تھیں جنہیں پہلے ہی یوکرین نے مسترد کیا تھا۔

امریکی محکمہ خارجہ اور روسی و یوکرینی سفارت خانوں نے اس معاملے پر تبصرہ کرنے سے انکار کیا ہے، جبکہ وائٹ ہاؤس نے بھی اس پر کوئی براہِ راست ردعمل نہیں دیا، البتہ ٹرمپ نے اپنے خصوصی ایلچی کو ماسکو بھیجنے کی ہدایت دی ہے۔

امریکی حکام کے مطابق، یوکرین پر دباؤ ڈالا جا رہا ہے کہ اگر وہ اس منصوبے پر دستخط نہ کرے تو اس کی فوجی امداد محدود کی جا سکتی ہے۔ منصوبے کا کچھ حصہ میامی میں ہونے والی ملاقات میں تیار کیا گیا، جس میں ٹرمپ کے داماد جیرڈ کشنر بھی شامل تھے۔