اسلام آباد: (رائیٹ ناؤنیوز) بجلی کے نرخوں میں مزید 2 روپے 52 پیسے فی یونٹ اضافے کا امکان ظاہر کیا گیا ہے۔ اس اضافے سے بجلی صارفین پر اربوں روپے کا اضافی مالی بوجھ پڑنے کا خدشہ ہے۔

سینٹرل پاور پرچیزنگ ایجنسی (سی پی پی اے) نے نیپرا سے بجلی کی قیمت بڑھانے کی درخواست کی ہے۔ جولائی کی ماہانہ فیول پرائس ایڈجسٹمنٹ کے تحت بجلی کی قیمت میں اضافے کی درخواست پر نیپرا میں آج سماعت ہوگی۔

درخواست میں بتایا گیا ہے کہ جولائی میں ڈیزل سے بجلی کی پیداواری لاگت 50 روپے فی یونٹ جبکہ درآمدی کوئلے سے 54 روپے 47 پیسے فی یونٹ رہی۔ اسی طرح درآمدی ایل این جی سے 47 روپے 37 پیسے فی یونٹ تھی۔

نیپرا آج کی سماعت مکمل ہونے کے بعد بجلی کی قیمتوں میں اضافے کو حتمی شکل دے گی۔ تین ہفتے قبل بھی نیپرا نے 75 پیسے فی یونٹ اضافے کی منظوری دی تھی۔

واضح رہے کہ جون 2026 کے فیول چارجز 8.4641 روپے فی یونٹ تھے جبکہ ریفرنس چارجز 7.7138 روپے تھے۔ اسی بنیاد پر فیول ایڈجسٹمنٹ کی مد میں اضافہ کیا گیا۔