مظفرآباد: (رائیٹ ناؤنیوز) مسلم لیگ (ن) آزاد کشمیر کے صدر شاہ غلام قادر اور سابق وزیراعظم راجہ فاروق حیدر نے بیرسٹر افتخار گیلانی کو آزاد کشمیر کا وزیراعظم نامزد کرنے کا فیصلہ مسترد کر دیا ہے۔ ان کا کہنا ہے کہ وہ ووٹ نہیں دیں گے اور نہ ہی اسمبلی اجلاس میں شرکت کریں گے۔

شاہ غلام قادر نے پارٹی قیادت کے فیصلے پر شدید تحفظات کا اظہار کیا ہے۔ ذرائع کے مطابق ان کا کہنا ہے کہ ٹیکنوکریٹ نشست پر منتخب افتخار گیلانی کو وزیراعظم کے لئے مناسب نہیں سمجھتے۔

مسلم لیگ (ن) کے ذرائع کے مطابق شاہ غلام قادر اور راجہ فاروق حیدر نے اسلام آباد میں ہونے والے اجلاس میں بھی افتخار گیلانی کی مخالفت کی تھی۔ اجلاس میں اختلافات اور تحفظات پر بھی بات چیت ہوئی۔

یہ معاملہ آزاد کشمیر میں مسلم لیگ (ن) کے اندر نئی سیاسی صف بندی کا باعث بن سکتا ہے۔ پارٹی کے مختلف دھڑے مشاورت میں مصروف ہیں اور آئندہ کے لائحہ عمل پر غور جاری ہے۔

یاد رہے کہ مسلم لیگ (ن) آزاد کشمیر کے اندر وزیراعظم کے امیدوار کے حوالے سے اختلافات نے حکومت سازی کے عمل کو متاثر کیا ہے۔ شاہ غلام قادر کی جانب سے نواز شریف کے فیصلے سے اختلاف کے بعد نئی سیاسی صورت حال پیدا ہو گئی ہے۔