پشاور: (رائیٹ ناؤ نیوز) وزیر اطلاعات خیبر پختونخوا شفیع جان نے حکومت پر الزام عائد کیا ہے کہ اس نے عدالتی فیصلے کے ساتھ عمران خان کی صحت کے ساتھ بھی کھلواڑ کیا ہے۔ یہ بات انہوں نے جیو نیوز کے پروگرام میں بات کرتے ہوئے کہی۔

شفیع جان نے بتایا کہ عدالتی حکم کے مطابق عمران خان کو شفا اسپتال لے جانا تھا، مگر وہاں کوئی پی ٹی آئی کا کارکن موجود نہیں تھا۔ انہوں نے مزید کہا کہ عمران خان کا کوئی ٹیسٹ نہیں ہوا، صرف بلڈ پریشر چیک کیا گیا اور آنکھ میں انجکشن لگایا گیا۔

انہوں نے کہا کہ حکومت جو بھی رپورٹ سپریم کورٹ میں پیش کرے گی، وہ ہمیں قبول نہیں ہو گی۔ پی ٹی آئی کی ایک دھڑا جو مذاکرات کا حامی تھا، اب وہ بھی سڑکوں پر نکلنے کو تیار نظر آ رہا ہے۔

شفیع جان کا کہنا ہے کہ حکومت نے سپریم کورٹ کے حکم کو نظرانداز کیا اور عمران خان کی صحت کے ساتھ کھلواڑ کیا۔ انہوں نے توہین عدالت کی کارروائی کی طرف جانے کا ارادہ ظاہر کیا۔

یاد رہے کہ قید تنہائی کی وجہ سے عمران خان کو اینگزائیٹی ہو گئی ہے اور بلڈ پریشر کی شکایت رہتی ہے۔ سپریم کورٹ کے آرڈر پر عمل نہ ہونا بدقسمتی قرار دیا گیا۔