تہران: (رائیٹ ناؤ نیوز) پاسداران انقلاب کے کمانڈر محمد رضا نقدی نے دعویٰ کیا ہے کہ امریکی فوج پہلے کے مقابلے میں کمزور ہے۔ انہوں نے کہا کہ ایران دشمن کی سرزمین تک حملوں کی صلاحیت پیدا کرنے کے لیے کوشاں ہے۔

ایرانی کمانڈر نے بتایا کہ ایران نے جنگ میں کامیابی حاصل کی ہے اور دشمن کی سرزمین پر حملے کرنے کی قوت پیدا کی جا رہی ہے۔ انہوں نے مزید کہا کہ جنگ جتنی طویل ہوگی، ایران اتنا ہی زیادہ تجربہ حاصل کرے گا۔

محمد رضا نقدی نے کہا کہ ایران اب تک امریکا کے ساتھ براہِ راست جنگ میں نہیں تھا، لیکن موجودہ جنگ میں ان کی فوجی حکمت عملی میں بہتری آئی ہے۔ انہوں نے کہا کہ ایران جنگ میں خود کو فاتح سمجھتا ہے۔

ایرانی کمانڈر کے مطابق، ایران نے پانچ ماہ میں جنگی میدان میں بہت کچھ سیکھا ہے اور امریکی فوجی توقعات سے زیادہ کمزور ثابت ہوئی ہے۔ انہوں نے کہا کہ ایران ہتھیاروں کی تیاری میں خود کفیل ہو رہا ہے۔

واضح رہے کہ ایران کی اسلامی انقلابی گارڈز کور (IRGC) ملک کی داخلی اور سرحدی سکیورٹی کی ذمہ دار ہے اور امریکا کے ساتھ جاری جنگ میں اہم کردار ادا کر رہی ہے۔