اسلام آباد: (رائیٹ ناؤ نیوز) وزیر مملکت برائے داخلہ طلال چوہدری نے کہا ہے کہ پی ٹی آئی قیادت راولپنڈی مال روڈ واقعے کی ذمہ داری سے بری نہیں ہو سکتی۔ ہلاک ملزم خیبرپختونخوا ہاؤس میں مقیم رہا اور پی ٹی آئی قیادت سے ملاقاتیں کرتا رہا۔

طلال چوہدری نے اسلام آباد میں پریس کانفرنس کے دوران کہا کہ راولپنڈی مال روڈ پر افسوسناک واقعہ پیش آیا۔ ایک سیاسی جماعت کے کارکن نے فائرنگ کی، جس سے سکیورٹی فورسز کا اہلکار زخمی ہوا۔

انہوں نے مزید کہا کہ پی ٹی آئی کو نفرت اور تشدد کی سیاست سے باز رہنے کی تاکید کی گئی تھی۔ 9 مئی اور 26 نومبر جیسے سانحات کی وجہ بھی یہی سیاست بنی۔

معاون خصوصی اطلاعات کا کہنا تھا کہ محمد حسین ایم پی اے عبدالغنی کے حلقے سے تعلق رکھتا تھا۔ عبدالغنی کے مطابق محمد حسین کا ذہنی توازن درست نہیں تھا۔

واضح رہے کہ راولپنڈی واقعے کے بعد تحقیقات جاری ہیں۔ ترجمان کے مطابق ملزم کے قبضے سے ملنے والے شواہد سے مزید انکشافات متوقع ہیں۔