راولپنڈی: (رائیٹ ناؤ نیوز) موسلادھار بارش کے باعث نالہ لئی میں پانی کی سطح خطرناک حد تک بلند ہوگئی ہے۔ گوالمنڈی اور کٹاریاں کے علاقوں سے شہریوں کا انخلا شروع کردیا گیا ہے۔

رات بھر جاری رہنے والی بارش سے نالہ لئی میں پانی کی سطح مسلسل بڑھتی رہی۔ حکام نے سیلابی خطرے کی وجہ سے راولپنڈی اور اسلام آباد میں ایمرجنسی کا اعلان کیا ہے۔

ضلعی انتظامیہ نے ہنگامی صورتحال سے نمٹنے کے لیے پاک فوج سے مدد طلب کرلی ہے۔ نالہ لئی کے کٹاریاں مقام پر پانی کی سطح 22 فٹ تک پہنچ چکی ہے۔

پانی کی سطح میں اضافے کے باعث نشیبی علاقوں میں الرٹ جاری کردیا گیا ہے۔ شہریوں کو محفوظ مقامات پر منتقل کرنے کا عمل جاری ہے اور احتیاطی تدابیر اختیار کرنے کی ہدایت کی گئی ہے۔

یاد رہے کہ اسلام آباد اور راولپنڈی میں 113 ملی میٹر تک بارش ہوچکی ہے۔ گولڑہ، سیدپور اور دیگر مقامات پر بارش کے ریکارڈ اعداد و شمار اہم ہیں۔