اسلام آباد: (رائیٹ ناؤ نیوز) وزیراعظم کے مشیر رانا ثنا اللہ نے کہا ہے کہ پاکستان میں ہائبرڈ نظام نہیں، بلکہ آئینی جمہوری نظام موجود ہے۔ انہوں نے نجی ٹی وی پروگرام میں گفتگو کے دوران کہا کہ محسن نقوی کے ‘سسٹم تباہ ہو چکا’ والے بیان کا کوئی واضح سیاق و سباق نہیں۔

رانا ثنا اللہ نے وضاحت کی کہ پاکستان میں پارلیمانی جمہوری نظام آئین کے مطابق فعال ہے۔ وفاق، عدلیہ اور انتظامیہ سب 1973 کے آئین کے تحت اپنی ذمہ داریاں انجام دے رہے ہیں۔ انہوں نے کہا نظام کے تباہ ہونے کی بات درست نہیں۔

وزیراعظم کے مشیر نے کہا کہ نئے انتظامی یونٹس یا صوبوں کی ضرورت ہو تو وہ آئینی طریقہ کار کے تحت بنیں گے۔ انہوں نے بااختیار بلدیاتی نظام اور انتظامی اصلاحات کی بات کی، مگر آئین سے ہٹ کر کسی اقدام کو ناممکن قرار دیا۔

رانا ثنا اللہ نے سیاسی اور عسکری قیادت کے تعاون کی تعریف کی، جس کی بدولت پاکستان کو عالمی سطح پر عزت ملی۔ ان کے مطابق دہشت گردی کے خلاف کامیاب اقدامات قومی یکجہتی کا نتیجہ ہیں۔

یاد رہے کہ مشیر وزیراعظم نے آزاد کشمیر انتخابات کو شفاف قرار دیا اور عوامی شرکت کی تعریف کی۔ انہوں نے کہا کہ بعض عناصر انتخابات میں رکاوٹ ڈالنا چاہتے تھے، مگر بھارتی ایجنڈے کو شکست ہوئی۔