لاہور: (رائیٹ ناؤنیوز) پنجاب حکومت نے گندم کی نئی ریلیز قیمت 3 ہزار 800 روپے فی من مقرر کردی ہے۔ یہ اعلان پنجاب کابینہ کی منظوری کے بعد محکمۂ فوڈ سیفٹی اینڈ کنزیومر پروٹیکشن کی جانب سے نوٹیفکیشن کے ذریعے کیا گیا۔

حکام کا کہنا ہے کہ اس اقدام کا مقصد صوبے میں گندم اور آٹے کی بلا تعطل فراہمی کو یقینی بنانا ہے۔ حکومت نے قیمتوں میں استحکام برقرار رکھنے کی کوشش کی ہے۔

پنجاب حکومت کو وفاقی حکومت کی جانب سے پاسکو سے فوری گندم خریدنے کی ہدایت کی گئی ہے۔ ابتدائی طور پر 3 لاکھ میٹرک ٹن گندم فراہم کرنے کی منظوری دی گئی ہے۔

یہ اقدام مہنگائی کے ستائے شہریوں کے لیے ریلیف فراہم کرنے کی کوشش ہے۔ حکومت نے 15 روپے میں روٹی کی فراہمی کو یقینی بنانے کے لیے مؤثر نگرانی کی ہدایات جاری کی ہیں۔

یاد رہے کہ پنجاب حکومت نے مجموعی طور پر 8 لاکھ میٹرک ٹن گندم کی فراہمی کی درخواست کی تھی۔ اس کے مقابلے میں 5 لاکھ 33 ہزار 440 میٹرک ٹن گندم مختص کی گئی ہے۔