اسلام آباد: (رائیٹ ناؤ نیوز) وفاقی وزیر داخلہ محسن نقوی نے کہا ہے کہ موجودہ نظام اپنی آئینی مدت پوری کرے گا اور شہباز شریف 5 سال تک وزیر اعظم رہیں گے۔ انہوں نے مزید کہا کہ وفاقی کابینہ کے تمام وزراء کی کارکردگی کا جائزہ لیا جائے گا۔

محسن نقوی نے جیو نیوز سے گفتگو میں کہا کہ وزیراعظم تمام وزارتوں کی کارکردگی کی جانچ تیسرے فریق سے کروائیں اور نتائج عوام کے سامنے رکھیں۔ ان کے مطابق اس سے پتا چلے گا کہ کون سی وزارت کتنی مؤثر کام کر رہی ہے۔

انہوں نے کہا کہ کابینہ میں ان کی حاضری 70 فیصد ہے اور خود پر تنقید کا جواب دیتے ہوئے کہا کہ جن لوگوں نے کہا کہ انہوں نے 30 سال کا سفر 3 سال میں طے کیا، ان کا شکریہ۔

محسن نقوی کا کہنا تھا کہ 80 سال سے جو نظام چل رہا تھا، وہ تباہ ہو چکا ہے اگر وہ صحیح کام کر رہا ہوتا تو ملک کہاں سے کہاں پہنچ جاتا۔ انہوں نے حکومت پر چارج شیٹ کرنے سے انکار کیا اور کہا کہ وہ خود حکومت کا حصہ ہیں۔

واضح رہے کہ محسن نقوی نے کہا کہ لوگوں کی خواہش ہے کہ ان کے اور وزیراعظم کے تعلقات خراب ہو جائیں، لیکن حکومت اپنی مدت پوری کرے گی۔ انہوں نے مزید کہا کہ وزیراعظم 14 سے 16 گھنٹے کام کر رہے ہیں اور چیزیں بہتر ہو جائیں تو نتائج ہزار گنا بہتر ہو جائیں گے۔