اسلام آباد: (رائیٹ ناؤ نیوز) الیکشن کمیشن نے الیکشن رولز 2017 میں ترمیم کا مسودہ جاری کر دیا ہے۔ اس ترمیم کے تحت اثاثوں اور واجبات کے گوشواروں میں ابہام کی وضاحت طلب کی جا سکے گی۔

مجوزہ ترمیم کے مطابق الیکشن کمیشن ارکان اسمبلی اور متعلقہ اداروں سے وضاحت مانگ سکے گا۔ مالیاتی ادارے بھی ضروری وضاحت فراہم کرنے کے پابند ہوں گے۔

الیکشن کمیشن وضاحت کے لیے مقررہ مدت بھی طے کرے گا تاکہ معلومات بروقت فراہم کی جا سکیں۔ عوام سے اعتراضات اور تجاویز بھی طلب کر لی گئی ہیں۔

یہ ترمیم شفافیت کو فروغ دینے کے لیے اہم سمجھی جا رہی ہے، جو الیکشن عمل کی ساکھ کو بہتر بنا سکتی ہے۔

یاد رہے کہ مجوزہ ترمیم رول 137 میں سب شق کے اضافے کے ذریعے پیش کی گئی ہے۔ اعتراضات 15 اگست 2026 تک جمع کرائی جا سکیں گی۔