انقرہ: (رائیٹ ناؤ نیوز) ترک فضائیہ کی تاریخ میں پہلی بار ایک خاتون کو جنرل کے عہدے پر ترقی دی گئی ہے۔ کرنل اوزلم کاراپنار کو سپریم ملٹری کونسل کے فیصلے کے تحت بریگیڈیئر جنرل بنایا گیا، جس کی منظوری ترک صدر رجب طیب اردوان نے دی۔

ترک میڈیا کے مطابق اوزلم کاراپنار کی ترقی کو ترکی کی مسلح افواج، بالخصوص فضائیہ کی تاریخ میں ایک اہم سنگ میل سمجھا جا رہا ہے۔ انہوں نے اپنی تعلیم کے بعد ترک فضائیہ اکیڈمی میں شمولیت اختیار کی۔

اوزلم کاراپنار نے اپنے فوجی کیریئر کے دوران کئی عسکری یونٹس اور اہم انتظامی ذمہ داریوں میں خدمات سرانجام دیں۔ ان کی ترقی کا فیصلہ ترک صدر کی زیر صدارت منعقدہ سپریم ملٹری کونسل کے سالانہ اجلاس میں ہوا۔

اس ترقی کو خواتین کی ترک فضائیہ میں نمائندگی کے حوالے سے اہم سمجھا جا رہا ہے۔ یہ اقدام ترکی میں عسکری میدان میں صنفی برابری کی طرف اہم قدم ہے۔

واضح رہے کہ سپریم ملٹری کونسل ترک فوجی تقرریوں اور ترقیوں کے فیصلوں کے لیے اعلیٰ ادارہ ہے۔ اس کی بنیاد 1837 میں عثمانی دور میں رکھی گئی تھی اور 1925 میں جمہوریہ ترکی کے قیام کے بعد دوبارہ قائم کیا گیا۔