اسلام آباد: (رائیٹ ناؤ نیوز) سپریم کورٹ نے فوت شدہ ملازمین کی وراثت کے بارے میں اہم فیصلہ سنادیا ہے۔ چیف جسٹس یحییٰ آفریدی کی سربراہی میں جاری کردہ 4 صفحات پر مشتمل فیصلے میں واضح کیا گیا ہے کہ فوت شدہ ریٹائرڈ ملازمین کی پنشن اور مراعات کی قانونی حق دار صرف بیوہ ہے۔

عدالت نے کہا ہے کہ بہن بھائی پنشن کے حقدار نہیں بن سکتے، قانونی وارث ہونا پنشن کے حقدار ہونے کی ضمانت نہیں دیتا۔ پنشن بیوہ یا قانون کے تحت نامزد شخص کو ہی دی جا سکتی ہے۔

فیصلے کے مطابق پنشن کی ادائیگی متعلقہ قوانین اور ادارے کے رولز کے مطابق ہی ممکن ہے۔ عدالت نے مزید کہا ہے کہ قوانین کی پابندی لازم ہے۔

عدالت نے پیسکو ملازم کے بہن بھائیوں کی وراثت نامہ جاری کرنے کی اپیل مسترد کردی۔ اس فیصلے کے ساتھ پشاور ہائیکورٹ کا فیصلہ برقرار رکھا گیا ہے۔

واضح رہے کہ یہ فیصلہ پنشن کی تقسیم کے قوانین کی وضاحت کرتا ہے اور اس سلسلے میں قانونی پیچیدگیوں کو کم کرنے میں مددگار ثابت ہو سکتا ہے۔