لاہور: (رائیٹ ناؤ نیوز) لاہور میں 263 ملی میٹر بارش کے باعث شہر کا نظام زندگی مفلوج ہوگیا۔ سڑکیں اور انڈر پاسز زیر آب آگئے، جبکہ ڈیفنس کے علاقے میں شہریوں نے کشتیوں کا استعمال شروع کردیا۔

شہر میں شدید بارش کے باعث نشیبی علاقے متاثر ہوئے۔ لاہور ایئرپورٹ کے علاقے میں سب سے زیادہ 263 ملی میٹر بارش ریکارڈ کی گئی۔ تاجپورہ، مغل پورہ اور دیگر علاقوں میں بھی بارش نے تباہی مچائی۔

شہریوں کو ڈیفنس میں پانی کے نکاس میں دشواری کا سامنا کرنا پڑا، جس کے باعث کشتیوں کا استعمال ناگزیر ہوگیا۔ واسا کے مطابق 80 فیصد علاقوں سے پانی نکال لیا گیا ہے۔

بارش کے نتیجے میں ٹریفک کا نظام درہم برہم ہوگیا، جبکہ کئی علاقوں میں موٹر سائیکل حادثات بھی پیش آئے۔ فیروز پور روڈ پر بارش کے پانی کے باعث حادثات میں 2 نوجوان جاں بحق ہوگئے۔

یاد رہے کہ مون سون کے دوسرے اسپیل کے جاری رہنے کا امکان ہے، شہریوں کو نشیبی علاقوں اور کمزور عمارتوں کے قریب جانے سے منع کیا گیا ہے۔