اسلام آباد: (رائیٹ ناؤ نیوز) فیڈرل پبلک سروس کمیشن نے سی ایس ایس امیدواروں میں 45 فیصد کمی کے تاثر کو مسترد کر دیا ہے۔

ایف پی ایس سی کا کہنا ہے کہ سی ایس ایس سے متعلق حالیہ خبر حقائق پر مبنی نہیں ہے، اور یہ تاثر غلط ہے کہ پاکستانی نوجوان سول سروس میں دلچسپی کھو رہے ہیں۔

کمیشن نے وضاحت کی ہے کہ 2022 کے اعداد و شمار کو غلط انداز میں پیش کیا گیا، اور خبر میں سی ایس ایس اسکریننگ ٹیسٹ کے امیدواروں کی تعداد کو نظرانداز کیا گیا۔

ایف پی ایس سی نے بتایا کہ خصوصی سی ایس ایس 2023 کے تحت 141 امیدواروں کو سول سروس میں شمولیت کا موقع ملا، جو آج بھی نوجوانوں کا خواب ہے۔

واضح رہے کہ سی ایس ایس کے امتحانات پاکستانی نوجوانوں کے لیے ایک اہم موقع تصور کیے جاتے ہیں، اور اس کے نتیجے میں سول سروس میں شمولیت کی خواہش برقرار ہے۔