اسلام آباد: (رائیٹ ناؤ نیوز) پاکستان اور چین کے درمیان جدید فارما صنعت کے فروغ کے لیے نئی شراکت داریوں کا آغاز ہوا ہے۔ ایس آئی ایف سی کی معاونت سے فارماسیوٹیکل، بائیوٹیکنالوجی اور ہیلتھ کیئر کے شعبوں میں تعاون بڑھ رہا ہے۔

اسلام آباد میں پاک چین فارماسیوٹیکل اینڈ ہیلتھ کیئر بی ٹو بی انویسٹمنٹ کانفرنس منعقد ہوئی۔ اس کانفرنس میں 300 سے زائد فارما کمپنیاں، چینی سپلائرز، سرمایہ کار اور کاروباری نمائندے شریک ہوئے۔ تقریباً 440 ملین ڈالر کے 9 سرمایہ کاری معاہدے طے پائے۔

چینی سرمایہ کاروں نے کہا ہے کہ تحقیق، جدت اور فارماسیوٹیکل شعبے میں مزید شراکت داری کے وسیع مواقع موجود ہیں۔ انہوں نے اس تعاون کو اہم قرار دیا ہے۔

وی سول گروپ اور ایل ڈی ایس فارما کے سی ای او نے کہا کہ ان معاہدوں سے پاکستان میں ویکسین کی مقامی تیاری ممکن ہوگی۔ یہ ملکی ضروریات پوری کرنے میں مددگار ثابت ہوگی۔

یاد رہے کہ وزارتِ صحت، ایس آئی ایف سی اور ڈرگ ریگولیٹری اتھارٹی کے تعاون سے یہ کانفرنس منعقد ہوئی۔ اس سے فارماسیوٹیکل شعبے میں سرمایہ کاروں کا اعتماد مزید مضبوط ہوا ہے۔